كيف اتخلص من اثار الحبوب التى توجد فى الظهر

**سهير احمد** الثلاثاء مايو 14, 2013 6:17 pm

عاوزين نتكلم باذن الله عن مشكلة مزعجة شوية اتنين تلاتة وخاصة في فصل الشتاء وهي مشكلة حبوب الظهر والاثار الخاصة بيها والقشور وما الي ذلك.

يفضل طبعا انك تعرضي نفسك علي طبيبة تقدر تحدد لك الاسباب والعلاج المناسب لحالتك وتتابع معاك علي حسب صحتك و متابعتها لحالتك.
خاصة اذا كانت الحبوب مرتبطة بحساسية او حبوب مليانة سائل مش مجرد حبوب سطحية علي الجلد وخلاص.
لان العلاج للحالة علي حسب شدتها قد يحتاج لمضادات حيوية عن طريق الفم كمان مع بعض انواع الدهان والمراهم و ماالي ذلك.

اولا انا حبوب الظهر اللي بتطلع عندي مجرد حبوب سطحية مش عميقة او مليانة سوائل بس مشكلتها الاثار اللي بتسيبها بعد ما بتنشف
فما احتجتش اي خطوات اضافية علي اللي هقول عليه بامر الله.
تابعوني في النصايح اللي هنقول عليها.

1- لازم ناخد شاور علي الاقل مرة كل يوم ويوم في الشتاء وطبعا في فصل الصيف ياريت لو علي الاقل مرة كل يوم.

2- بالنسبة للملابس لازم تبقي الملابس اللي ملامسه لسطح الجلد تبقي قطن تماما و تتغير بشكل دوري مانلبسهاش فترة طويلة.
ويفضل طبعا لو حد في البيت عنده حبوب او اي امراض تانية في جسمه انك تعزلي ملابسك عن ملابسه نهائي و تغسليها لوحدها.
وسائل التعقيم الديتول كويس جدا انك تضيفيه في ميه الشطف الاخيرة هو بيخلي
ريحة الملابس شريرة شوية كانك خارجة من قوضة عمليات بس شغال احسن من المرض
برضه.

3- ممنوع اكيد نلبس ملابس حد تاني خاصة الملابس المستخبية.

4- هنشتري الحاجتين القمرتين دول هما مش غاليين خالص تقريبا هيكلفوكي 20 جنيه بالكتير قوي
الاولي هي صابونة الكبريت اي نوع متوفر في الصيدليات.
وهنشتري كمان فرشاة الضهر ديه متوفرة في محلات مستحضرات التجميل.
ولو مالقيتهاش تقدري تستعملي الليفة المصرية العادية خالص بس يكون بها ايد
طويلة عشان تقدري تستعمليها علي كل ضهرك مش تسيبي حتة وتعملي حتة.
هي مش غالية ومتوفرة باذن الله.
ملحوظة:الليفة المغربي ما تنفعش في الغرض ده اما فرشاة الظهر او الليفة المصرية غير كده ماليش دعوة.

هتجيبي
صابونة الكبريت و ترغيها كويس جدا علي الليفة او فرشاة الضهر وبرفق خالص
تفركي الحبوب في اتجاه واحد وهو الاتجاه المصاب بالحبوب بس مش تعملي بيها
كل الضهر خدي بالك من كده.
و بعد ما تسيبي الرغوة شوية خمس دقايق مثلا علي الاماكن المصابة تشطفي بالميه الدافية اللي ياريت لو تكون مالية للسخونة شوية.
وتكرري الموضوع ده كل مرة تاخدي فيها الشاور باذن الله مرات معدودة وهتروح الحبوب نهائي.

5- نحاول لما نغسل شعرنا نغسله وهو مقلوب علي قدام
بلاش الشامبو والبلسم وحمامات الكريم والحاجات الجميلة ديه تنزل علي ضهرنا
ولو ماعرفتيش مش مهم.
حاولي تشطفي اثار الشامبو و البلسم والكريمات بسرعة قبل ما تتشرب في ضهرك.

6- عشان الاثار لو كانت غلسة شوية وسايبة اثر عميق ممكن نجيب زيت شجرة الشاي (Tea Tree Oil )
وتمسي علي الاثار اللي ضهرك باستعمال قطنة تنضيف الودان,
ديه بتعقم الحبوب خالص وبتساعد طبيعي جدا انها تنشف وفي فترة قصيرة وبتشيل الاثار.
زيت شجرة الشاي موجود في اورفليم وفي The Body Shop

- لو مش سهل عليكي انك تلاقي زيت شجرة الشاي مع انه مفضل جدا جدا جدا.
فيه ماسك تاني سهل وبسيط ممكن تستعمليه مرتين في الاسبوع قبل الشاور علي الضهر ومناطق الحبوب.
وتسيبيه لحد ما ينشف (الفترة الزمنية مش هتزيد عن 20 دقيقة)
وبعدين تفكريه بالراحة خالص و تشطفي اثناء الشاور.
الماسك ده عن تجربة ممتاز وبيوحد لون الضهر كمان وبيشيل اثار الحبوب وبينعمه جدا ممكن ينفع للجسم برضه
الماسك عبارة عن
(معلقتين كبار حنة عادية من العطار بس دايما بفضل
تجيبها ورق وتطحنيها انتي في البيت - معلقة سدر مطحون من العطار برضه -
معلقتين عسل نحل -معلقة عصير ليمون)
ما تخافوش بامر الله الحنة مش هتسيب لون علي الجسم

8- هناخد بالنا كويس من اكلنا
لان معروف الحبوب من اهم اسبابها الاكل والشرب .
هناكل دهون اقل مخللات اقل سكريات اقل
نشرب سوايل كتير جدا و كمان مشروبات دافية صحية زي البابونج والينسون و القرفة والنعناع كتير جدا.

9- الضهر ما يترطبش باي كريم او زيت في فترة علاجه من الحبوب.

الإثنين	الثلاثاء	الأربعاء	الخميس	الجمعة	السبت	الأحد
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30