المية وسيلة لزيادة الحرق وتقليل الشهية

"اشرب كوب ميه سخنة كل يوم أول ما تصحى من النوم".
"بلاش تشرب ميه في وسط الأكل علشان بتعمل كرش".

الميه
طبعا من الحاجات المهمة والأساسية جدا لحياتنا؛ لكن بالنسبة لدورها في
الريجيم وفايدتها في التخسيس؛ بنسمع يوميا كلام كتير من الأصدقاء والأقارب،
مش بنكون متأكّدين منه دايما.

النهارده هيكون كلامنا مع د. محمد
أبو الغيط -الأستاذ بكلية الطب جامعة القاهرة وسكرتير عام الجمعية المصرية
الطبية لدراسة السمنة- عن أهمية الميه في الريجيم ودورها في التخسيس..

في البداية عايزين نعرف أهمية الميه للإنسان؟
الميه
ضرورية جدا لحياة الإنسان، ومعروف طبعا إنها بتمثّل حوالي 65% من مكونات
جسمنا، وكل الأبحاث العلمية الحديثة بتأكّد ضرورة أن يحصل الفرد على لترين
من الماء يوميا؛ لكن مع الأسف معظمنا بينسى تماما أهمية الميه، ومش بنلجأ
لها إلا لما نشعر بالعطش الشديد؛ وخصوصا في فصل الشتاء، وده طبعا له أضرار
كتير سواء كانت على الصحة العامة أو في اللي يخصّ موضوع الريجيم والوزن.

والميه
بتلعب دور كبير جدا في زيادة نسبة التركيز عند الإنسان؛ علشان كده بننصح
الطلبة دايما إنهم يشربوا ميه كتير في أوقات المذاكرة والامتحانات،
بالإضافة إلى إنها بتحافظ على الكُلى وبتخلّص الجسم من السموم.

علشان
كده لازم دايما نهتم إنه يبقى فيه زجاجة ميه معانا طول الوقت، ونشربها على
طول مش لما نحس بالعطش بس؛ لأن إحساس العطش ده معناه إن الجسم خلاص بدأ
يعاني الجفاف، وبيطلب منك إنك تقدّم له احتياجاته من الميه.










الميه ليها أهمية كبيرة في زيادة معدل الحرق







إزاي ممكن تناول الميه يكون له دور في الريجيم والتخسيس؟
الميه مهمة جدا في الريجيم والتخسيس؛ أولا: من الناحية الميكانيكية للجسم،
فتناول كميات كبيرة من الميه بيملى جزء كبير من المعدة، وبالتالي مش
بنحتاج إننا ناكل كميات كبيرة من الأكل.

ثانيا: الميه بتلعب دور
كبير في زيادة معدل الحرق في الجسم؛ علشان كده هي ضرورية جدا خصوصا للناس
اللي مش بيكون عندها وقت لممارسة الرياضة بانتظام، لكنها طبعا مش بديلة
لممارسة الرياضة.

هل ممكن ندخّل كمية العصاير والسوائل اللي بنشربها من ضمن اللي بيحتاجها الجسم خلال اليوم؟
كمية الميه الصافية اللي بنحتاج لها يوميا هي لترين، بالإضافة إلى السوائل
التانية اللي بناخدها على مدار اليوم، وعموما تناول الفاكهة أكثر فائدة
للجسم من تناولها على شكل عصير؛ لأن تناول الفاكهة بيزوّد معدل الحرق في
الجسم، بالإضافة إلى أن الفاكهة بتحتوي على سعرات حرارية أقل من العصير،
حتى لو كان العصير من غير سكر.

هل تناول الميه في وسط الأكل بيتسبب في ظهور الكرش؟
المعلومة دي خاطئة تماما، ومع الأسف منتشرة جدا بين الناس، بل على العكس
تناول الميه في وسط الأكل مهم جدا في الريجيم؛ لأنها زي ما قلنا قبل كده
بتملى المعدة وبتقلل من كميات الأكل اللي بنحتاج ليها.

علشان كده
دايما بننصح الناس إنهم يغيروا عاداتهم الغذائية، ويتعوّدوا على تناول
الميه في وسط الأكل، وخصوصا أثناء فترة الريجيم والتثبيت.

أما بقى بالنسبة للكرش، فهو بيحصل لسببين؛ أولهما: قلة ممارسة الرياضة، وبالتالي عضلات البطن بتضعف وتؤدي لظهور الكرش.

أما السبب الثاني: فهو الهموم وضغوط الحياة، علشان كده معظم رجال الأعمال
والناس اللي بتشتغل في وظائف صعبة بيظهر عندهم الكرش بنسبة أكبر؛ وده بسبب
هرمون الكورتيزول اللي بيظهر عند إحساس الإنسان بالضغط التوتر.













الميه الساقعة مفيدة في الريجيم أكثر من السخنة





من النصائح اللي
بنسمعها كتير إن تناول الميه على الريق وخصوصا لو سخنة ومضاف عليها عصير
الليمون بيزود الحرق وبيساعد في التخسيس.. هل الكلام ده صحيح؟
الكلام ده مالوش أي أساس علمي؛ لأن دور الميه مش بيتأثر بكونها سخنة أو باردة أو عليها أي إضافات.

وعلى العكس، فإحنا بنفضّل تناول الميه الباردة أو الساقعة؛ لأنها بتحتاج
مجهود وطاقة من الجسم علشان تسخن وتوصل لدرجة الحرارة المناسبة للجسم،
وبالتالي فمعدل الحرق بيزيد.

بنسمع عن ريجيم الميه.. يا ترى ده ريجيم صحي ممكن الناس تتّبعه؟
الريجيم كمان بقى فيه موضة، ومن ضمن الموضات دي هي أنواع الريجيم اللي
بتعتمد على مادة غذائية واحدة؛ زي الميه أو الكرنب أو الفاكهة.


طبعا الريجيمات دي غير صحية بالمرة؛ لأن الريجيم لازم يحتوي على كل العناصر
الغذائية الليى بيحتاج ليها الجسم، وإلا هيتسبب في مشكلات صحية كتيرة.

أما بالنسبة لريجيم الميه فهو ظهر من فترة؛ لكنه مضر تماما لأن فكرته
بتعتمد على تناول مريض السمنة لكميات من الميه أكبر من المعدل الطبيعي اللي
بيحتاج ليها الجسم؛ وده ممكن يتسبّب في حالة تسمم للجسم، والصح إن الميه
تكون جزء من الريجيم مش تكون هي المكوّن الوحيد في النظام الغذائي.