ماكياج رقيق للبنت صاحبة الملامح الهادية

هنعمل لها لوك بسيط جدًّا مناسب للوجه الطفولي أو الـbaby face.

ودي الخطوات اللي هنعملها:
1-
أول حاجة هنبدأ بتوزيع الفاونديشن أو كريم الأساس واللي بيكون بدرجة قريبة
من لون البشرة أو باللون البرونزي لو عايزة تحصلي على درجة خمرية.

2-
وزي ما بنأكد دايماً في كل حلقة، إن الإسفنجة بتاعتنا لازم تكون جاهزة
ونظيفة، وكمان بنبللها بالماء ونعصرها كويس جداً قبل ما نوزع بها
الفاونديشن.

3- بعد ما انتهينا من توزيع الفاونديشن كله على البشرة
هنوزع اللوس باودر أو البودرة السايبة تحت العين، وبنوزعها باستخدام فرشاة
متوسطة أو باستخدام إسفنجة مخصصة للبودرة السايبة، والبودرة السايبة لها
ثلاثة أنواع شفافة ونصف شفافة وملونة.

4- ودلوقتي هنيجي لمرحلة
العيون، وبنحط لون آي شادو فاتح تحت الحاجب بالظبط وده قاعدة أساسية في فن
الميك أب، وطبعاً ما ننساش إن الفرش مهمة جداً في ظبط زوايا العين، وطبعاً
بنحط الأسود أو البني بفرشاة صغيرة نحدد بها فوق جذور الرموش بالظبط علشان
نرسم خط لطيف فوق العين نحدد به العين كلها علشان نبرزها.

5- علشان إحنا بنعمل لوك طبيعي مناسب للنهار وللجامعة، مش هنستخدم ألوان كتير فوق العين.

6-
بعد كده بنيجي لرسم العين بقلم الكحل اللي بنحدد به العين من جوه، وأهم
حاجة بالنسبة للكحل إننا نختار نوع كويس علشان ما يسيحش مننا، والقلم لازم
يكون مبري كويس، علشان يدينا الشكل اللي إحنا عايزينه، وبعد كده بنبدأ نسيح
الكحل من آخر العين لبره علشان يدينا شكل طبيعي وجذاب للعين.

7-
نيجي لمرحلة الماسكرا، وزي ما هنشوف في الفيديو إن فرشاة الماسكرا لازم
تكون واخدة الشكل الدائري بتاع الرموش علشان يسهل علينا إننا نقدر نرسم
الرموش من فوق وتحت.

8- بعد كده بننظف أي رواسب من الآي شادو أو
الكحل تكون وقعت تحت العين، وبعدين بنبدأ في رسم الحواجب وهنستخدم للحواجب
شادو بني مناسب مع لون الشعر والحواجب.

9- وفي النهاية هنوزع البلاشر أو أحمر الخدود، وبالنسبة للون ملمع الشفايف فاحنا اخترناه بلون هادي وبناتي.