لروتين اليومي لتنظيف وترطيب البشرة الدهنية والمركبة

هنتكلّم عن الروتين اليومي والأسبوعي للبشرة المركّبة والدهنية والبشرة اللي فيها حبوب..



وإيه الحاجات اللي ممكن نعملها علشان نعالج الحبوب ونحصل على بشرة ناعمة زي الأطفال.





أهم حاجة إننا لما نظبّط الروتين اللي هنمشي عليه نستمر على نفس المكونات لمدة أسبوع على الأقل أو لمدة شهر؛ يعني نفس المكونات اللي هنستعملها في أول يوم هنستمر عليها باقي الشهر أو لباقي الأسبوع على الأقل، وكمان من الحاجات المفيدة إننا نغيّر في الروتين كل ثلاثة شهور علشان البشرة ماتتعوّدش على روتين معين.





- أول حاجة لما نقوم من النوم ناخد الشاور ونغسل جسمنا وبشرتنا، وهنستخدم للوش إما غسول معين متعوّدين عليه زي نيتروجينا ونجيبه للبشرة الدهنية أو المركبة، أو نستخدم صابونة لمبادا للبشرة الدهنية أو المركبة، أو نعمل خليط من الترمس المطحون والردة ونفرك به وشنا بشكل دائري.

- بعد كده هنحط مية ورد أو مية نعناع.

- بعد كده هنحط أي مرطب، وده ممكن يكون إما خيار أو لبن وعسل أو لبن رايب، هنختار حاجة منهم ونستخدمها كمرطب يوميا لمدة شهر، ونسيبه على وشنا لمدة 15 : 20 دقيقة، وبعدين نشطف وشنا بالمية.

- لو هنخرج يبقى لازم نحط صن بلوك، ومن الماركات الهايلة هي ماركة فوتوديرما، ودي ماركة فرنسية ونتيجتها هايلة جدا، وهنحط الصن بلوك قبل ما ننزل بنصف ساعة، وبعدين نبدأ نحط ميك أب خفيف.

- بعد كده لما نرجع من مشوارنا هنعمل نفس الروتين؛ يعني ناخد شاور ونغسل وشنا بنفس الصابون أو الغسول، وبعدين نحط مية الورد، وبعدين نحط مرطب للبشرة مكوّن من حبوب اللقاح والليمون.

ماسك حبوب اللقاح

المقادير:

عصير ليمونة
1/ 2 كوب مية
ملعقة صغيرة حبوب لقاح

الطريقة:
هنخلط المكوّنات دي مع بعض ونقلّبها، وبعدين نصبّها في قوالب التلج، ونحطّها في الفريزر لحد ما يتجمّد.



هناخد مكعب أو اتنين يوميا، ونمشّيه على البشرة بشكل دائري وسريع من أسفل البشرة لأعلى، وبالنسبة للعين هنمشّيه من جوه لبره، والجبهة هنمشيه لفوق وبعدين على الأجناب، والرقبة ماننساهاش وهنمشّيه عليها من تحت لفوق.

هنسيب الماسك ده على الوش لحد ما ينشف تماما، وبعدين نشطفه بالمية.

الماسك ده هنستخدمه كمرطب، وممكن نستخدمه في المصيف علشان يرطب من تأثير مية البحر أو البسين أو الشمس.

- آخر حاجة هنعملها قبل ما ننام علشان نرطب بشرتنا ونسيبها ناعمة زي بشرة الأطفال؛ هنعمل لوسيون بالبرتقال والليمون.

لوسيون البرتقال
المقادير:

بشر برتقالة
بشر ليمونة
3/ 4 كوب مية
الطريقة:
هناخد بشر البرتقال وبشر الليمون ونحطّهم في المية، ونخلّيهم يغلوا لمدة 15 دقيقة لحد ما الكمية تقل النصف، وبعدين نصفّيها.

ممكن نحط اللوسيون ده في علبة زجاج صغيرة، ونسيبه في التلاجة لمدة 4 : 6 أيام، وده هنستعمل منه طول الأسبوع.

هنستمر على اللوسيون ده لمدة شهر وهيعمل نتيجة هايلة جدا؛ لأنه هيساعد على قبض مسام البشرة، بالإضافة للنضارة والنعومة، وكمان بيغذّي البشرة بزيوت طبيعية، وده لأن الليمون والبرتقال بيبقى فيهم نسبة زيوت كبيرة.



ودي شوية نصايح هنعملها قبل النوم
الماسك ده هنحط منه على وشنا قبل النوم ونسيبه لمدة 15 : 20 دقيقة، وهنجدده 3 مرات كل 5 دقائق، ونسيبه ينشف في كل مرة، بعد كده في الآخر هنشطفه بالمية، وبعدين نحط كريم أو زيت على حسب المرحلة العمرية، وممكن نسيب الماسك ده على وشنا لحد الصبح هنحس بنتيجة هايلة، والبشرة هتكون نضرة والمسام بتبدأ تقفل بشكل ملحوظ.

مهم جدا إننا قبل النوم ناخد شاور ونلبس هدوم جديدة ونضيفة، ونحط على جسمنا مرطبات وكريمات ونعطّر جسمنا، وخصوصا للبنات المتزوّجات.



ماسك حبوب اللقاح للجسم

المقادير:

2 ملعقة كبيرة زيت لوز
2 ملعقة كبيرة زيت زيتون
2 ملعقة كبيرة حبوب اللقاح
2 ملعقة كبيرة زيت سمسم
2 ملعقة كبيرة زيت عباد أو زيت ذرة

الطريقة:
هنخلط كل الزيوت مع حبوب اللقاح، ونقلّبهم كويس أوي، وهيكون قوامه زي الكريم الخفيف.

هنحط اللوسيون ده في زجاجة ونسيبه في التلاجة، وهنستعمل منه كل يوم على الجسم بعد الشاور.

هنحط منه على الجسم وهو مندّي من تحت لفوق في اتجاه القلب، وممكن ملعقة كبيرة تكفي للجسم كله؛ لأن مسام الجسم هتكون مفتوحة بعد الشاور ومن البخار، وهنسيبه على جسمنا وننام بيه، ومع الاستمرار في استخدامه هنحس بفرق كبير في جسمنا.

الماسك ده بيساعد جدا على تقوية جلد الجسم وتنعيمه وبيعمل نضارة للبشرة، وبيساعد بشكل كبير على تقليل ظهور التجاعيد.[